17:20 - 5.06.2026

---

5 iyun, Fineko/abc.az. Bu ilin aprel ayının sonuna olan vəziyyətə görə, Azərbaycanda rezident maliyyə təşkilatları tərəfindən dövriyyəyə buraxılmış "Visa" ödəniş kartları vasitəsilə həyata keçirilən əməliyyatların sayı 166,806 milyon vahid, bu əməliyyatların ümumi dəyəri isə 8,230 milyard manat təşkil edib.

ABC.AZ xəbər verir ki, bu barədə məlumat Mərkəzi Bankın hesabatında yer alıb.

Məlumata əsasən, ötən ilin analoji dövrü ilə müqayisədə yerli bankların "Visa" kartları ilə aparılan əməliyyatlarında stabil artım dinamikası qeydə alınıb:

Əməliyyatların sayı: Ötən ilin eyni dövrünə nisbətən 29,193 milyon vahid və ya 21,2% artıb;

Əməliyyatların həcmi: Ötən ilin aprel ayı ilə müqayisədə 273 milyon manat və ya 3,4% böyüyüb.

Xarici kartlarla (qeyri-rezidentlər) aparılan əməliyyatlar:

Hesabat dövründə xarici ölkələrin maliyyə təşkilatları tərəfindən emissiya edilmiş (qeyri-rezident) "Visa" kartları ilə Azərbaycan ərazisində 725,6 min vahid əməliyyat icra olunub. Sözügedən əməliyyatların ümumi həcmi isə 59 milyon manat təşkil edib.

Dövriyyədəki ümumi kartların sayı rekord həddədir:

Mərkəzi Bankın hesabatında o da qeyd olunur ki, aprel ayının sonuna olan məlumata görə, "Azərpoçt" MMC və bank sistemində dövriyyədə olan ümumi ödəniş kartlarının sayı əvvəlki ayla müqayisədə daha 108 min ədəd artıb və 22 milyon 518 minə çatıb.