21:00 - 2.06.2026

---

2 iyun, Fineko/abc.az. ABŞ Azərbaycanın enerji sektorunda yeni investisiya layihələrinin həyata keçirilməsində maraqlıdır və bu istiqamətdə konkret təşəbbüslər üzərində işləyir.

ABC.AZ Azərtac-a istinadən xəbər verir ki, bu barədə ABŞ Dövlət katibinin iqtisadiyyat, enerji və biznes məsələləri üzrə köməkçisi Kaleb Orr 1-ci Azərbaycan-ABŞ iqtisadi dialoquna həsr olunmuş mətbuat konfransında bildirib.

Kaleb Orr qeyd edib ki, dialoqun məqsədi iqtisadi təklifləri bir araya gətirmək, onların həyata keçirilməsi üçün fəaliyyət planı hazırlamaq və real nəticələr əldə etməkdir, çünki sülhün təməlində ortaq maraqlar və iqtisadi rifah dayanır.

Mətbuat konfransından mühüm məqamlar:

• "ExxonMobil" və "Chevron" şirkətlərinin fəaliyyəti: ABŞ-nin enerji şirkətləri artıq Azərbaycanda mühüm layihələrdə iştirak edir. Bakı Enerji Həftəsi çərçivəsində "ExxonMobil" ilə görüş keçirilib. Şirkət ötən il ölkədə yeni kəşfiyyat işləri üzrə anlaşma memorandumu imzalayıb və tranzitlə bağlı bir sıra mühüm infrastruktur layihələrinin səhmdarıdır. Həmçinin "Chevron" şirkəti də Bakı Enerji Həftəsi çərçivəsində yeni araşdırma sazişi imzalayıb. ABŞ hökuməti bu konkret layihələrin irəliləməsini dəstəkləyir.

• İnfrastrukturda daha böyük rol: ABŞ daha geniş mənada Azərbaycanın yaratdığı boru kəməri və digər enerji infrastrukturlarında iştirakını artırmaq və orada daha böyük rol oynamaq niyyətindədir.

• Orta Dəhliz və Trampın təşəbbüsü: Vaşinqton Azərbaycanın Avropa və digər bazarlara enerji nəqlində mövqeyinin daha da güclənəcəyini gözləyir. "Prezident Donald Trampın sülh və rifah marşrutu sayəsində Azərbaycanın Avropaya və dünyanın digər bölgələrinə enerji nəqlində Orta Dəhlizin mərkəzi qovşağı kimi rolunu daha da artırmasına kömək edə biləcəyimizi düşünürük", - deyə Kaleb Orr vurğulayıb.

• Qlobal enerji təhlükəsizliyi: Azərbaycanın dünya üçün mühüm enerji istehsalçısı olduğunu deyən rəsmi, növbəti bir neçə il ərzində bu əməkdaşlığın əhəmiyyətli dərəcədə genişlənəcəyini gözlədiklərini əlavə edib.