17:17 - 5.08.2026
5 avqust, Fineko/abc.az. Hürmüz boğazının yenidən açılmasına dair müvəqqəti saziş ehtimalının inflyasiya narahatlıqlarını azaltması və ABŞ Federal Ehtiyat Sisteminin (FES) faiz dərəcələrini artırmaq ehtimalını aşağı salması fonunda qızılın qiyməti ardıcıl üçüncü gün dəyər qazanıb.
Qətər Hürmüzdə gəmi hərəkətini bərpa etməyə kömək edəcək layihənin hazırlandığını bildirib, "Axios" nəşri isə Vaşinqton, Tehran və Ummanın razılaşmaya yaxın olduğunu xəbər verib.
Bu fonda qızılın bir unsiyasının qiyməti gün ərzində 4%-dən çox artaraq 4,200 dollara, gümüşün qiyməti isə 4%-ə yaxın artımla 62.22 dollara yüksəlib. Fevral ayında başlayan ABŞ-İran münaqişəsindən sonra kəskin düşən qiymətlər, Çin institusional investorlarının dəstəyi ilə 4,000 dollar psixoloji həddinin üzərində mövqeyini qoruyub saxlayır.
